Niyə UFAZ?

Azərbaycan-Fransız Universitetini (UFAZ) digər ali təhsil müəssisələrindən fərqləndirən bir sıra əhəmiyyətli məqamlar mövcuddur.

• İki diplom

UFAZ tələbələri təhsillərini başa vurduqda iki dövlət diplomu - Azərbaycan Dövlət Neft və Sənaye Universitetinin (ADNSU), Strasburq Universitetinin (UNISTRA), eləcə də Renn 1 Universitetinin ("Neft və qaz mühəndisliyi" ixtisası üzrə) diplomunu alırlar.

• Strasburqda yay məktəbi

Tədris ili müddətində ən uğurlu akademik nəticə göstərmiş 40 tələbə iki həftəlik yay məktəbində iştirak etmək imkanı qazanır. Bununla tələbələr fransız dili biliklərini inkişaf etdirir, Fransa tarixi və mədəniyyəti ilə daha yaxından tanış olur, eyni zamanda Strasburqda yerləşən beynəlxalq təşkilat, akademik institut və elmi laboratoriyalara səfər edirlər.

• Elmi ekperimental təhsil və tədqiqatlar mərkəzi

Əsası 2018-ci ildə qoyulmuş və Strasburq Universitetinin standartlarına uyğun şəkildə təchiz olunmuş UFAZ laboratoriyaları Azərbaycanda ən eksklüziv texniki imkanlara malikdir. 2500m² sahəni əhatə edən altımərtəbəli binada 1 kimya mühəndisliyi, 1 ümumi kimya, 1 analitik kimya, 1 üzvi kimya, 4 fizika və 2 İKT laboratoriyası yerləşir. Tədris laboratoriyaları müəllim və tələbələrə dərsləri praktik şəkildə keçirmək, eyni zamanda araşdırma aparmaq imkanı verir.

• Akademik mükəmməllik

UFAZ həm peşəkar müəllim heyəti, həm də dəvət olunmuş beynəlxalq professorları ilə yalnız Azərbaycanda deyil, eyni zamanda regiondakı ən yüksək akademik mükəmməlliyə nail olmaq niyyətindədir. Azərbaycan və Fransadan olan yüksək ixtisaslı və dərin təcrübəyə malik müəllim heyəti dərsləri ingilis dilində tədris edir. Kurikulumun bir hissəsi olaraq fransız dilinin də öyrədilməsi isə tələbələrin magistratura təhsilini Fransada davam etdirməsi üçün şans yaradır.

Azərbaycanda orta məktəbi əla akademik göstəricilərlə bitirmiş və ya xaricdə orta məktəb təhsili almış şəxslər UFAZ üçün potensial tələbə hesab olunurlar. Burada təhsil almağı hədəfləyənlər Dövlət İmtahan Mərkəzinin (DİM) keçirdiyi imtahanlarda yüksək nəticə göstərməlidirlər. Həm yerli, həm də xarici tələbələrin ingilis dili üzrə fundamental biliklərə malik olması, eyni zamanda Strasburq Universiteti tərəfindən Bakıda təşkil olunan imtahanlardan uğurla keçməsi vacibdir.

Əcnəbi tələbələr ödənişli əsaslarla təhsil almaq üçün UFAZ-a müraciət edə bilərlər.

• Kreativlik

İxtisas biliklərinin təkmilləşdirilməsi, eyni zamanda dərsdənkənar fəaliyyətlərinin dəstəklənməsi məqsədilə tələbələrin laboratoriya işi, çöl təcrübələri, beynəlxalq və regional yarışlarda iştirakı daim təşviq edilir. UFAZ tələbələrə öz startap və elmi ideyalarını, Tələbə Şurası və tələbə klubları çərçivəsindəki fəaliyyətlərini həyata keçirmələri üçün platforma təklif edir.

• Mərkəzi məkan

2017-ci ildə təmir və yenidənqurma işlərindən sonra Azərbaycan Dövlət Neft və Sənaye Universitetinin 3-cü binası Azərbaycan-Fransız Universiteti (UFAZ) adı altında fəaliyyət göstərməyə başladı. Yerli əhəmiyyətli memarlıq abidəsi statusu daşıyan və dövlət tərəfindən qorunan tədris binası Bakı şəhəri, Nizami küçəsi 183 ünvanında yerləşir. Həm “28 May” metro stansiyasına yaxınlığı, həm də yerləşdiyi ərazidə yerüstü nəqliyyatın aktiv təşkil olunması bu məkanı tələbə və müəllim heyəti üçün əlçatan edir.