UFAZ-da SLB Şirkətinin Texniki Təlimi Baş Tutdu

Kimya Mühəndisliyi, Yer Elmləri və Neft-Qaz Mühəndisliyi ixtisaslarında təhsil alan UFAZ və ADNSU tələbələri SLB texnologiya şirkətinin UFAZ-da keçirilən “Quyuların sementlənməsinə giriş” adlı texniki təlimində iştirak etdilər.

SLB-nin Texniki dəstək üzrə mütəxəssisi Fərid İsazadə həm ilkin, həm də bərpaedici sementləmə üsullarını əhatə edən quyu çuxurunun sementlənməsinə dair məlumat verdi. Ekspert sementləmənin neft və qaz qazmaları, zonaların izolyasiyası, korpusun qorunması, quyuların dəstəklənməsindəki rolunun əhəmiyyətindən bəhs etdi. Sementləmənin məqsədləri, növləri, avadanlıqları, sementləməni uğurlu edən amillər xüsusilə diqqət mərkəzində oldu.

Sementləmənin quyuların tikintisi zamanı yeraltı layların möhürlənməsi, mayenin miqrasiyasının qarşısının alınması, korpusun ekstremal şəraitdən qorunması, ətraf mühitin mühafizəsi və təhlükəsizlik qaydalarına riayət olunmasını təmin etdiyi diqqətə çatdırıldı. Təlim sənayedə daha təhlükəsiz quyu əməliyyatlarına keçidin müşahidə olunduğunu vurğuladı.

UFAZ-ın məzunu və hazırda SLB texnologiya şirkətində sementləmə mühəndisi olaraq çalışan Əməl Heydərbəyova da tədbirdə iştirak edərək öz təcrübələrini bölüşdü. Tələbələri iş həyatına hazırlayan təlim onlar üçün neft-qaz sənayesində maraqlı karyera imkanlarına açılan qapı rolunu oynadı. Eyni zamanda sementləmə texnologiyası ilə innovativ həllər arasındakı əlaqəni ortaya qoydu.