Aberdin Universitetinin doktorantı Turan Mütəllimov UFAZ-da seminar keçirib

Noyabrın 4-də Aberdin Universitetinin doktorantı və Dövlət proqramının iştirakçısı Turan Mütəllimov Azərbaycan-Fransız Universitetində (UFAZ) “Dənizlərin Mikrobioloji Mühafizəçiləri: Xam Neftin Təmizlənməsində Bakteriyaların Potensialının Aşkarlanması” adlı tədqiqat seminarı keçirib. Seminar iştirakçıları dəniz mühitində xam neftin parçalanmasında mikrob proseslərindən istifadə üsulları haqqında yenilikçi metodlarla bağlı məlumatlar əldə ediblər.

Qeyd edək ki, Turan Mütəllimov 2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramının təqaüdçüsüdür və bu təqaüd ona Aberdin Universitetində təhsil almağa imkan yaradır.

Azərbaycan Dövlət Neft və Sənaye Universitetinin məzunu olan və Neft Mühəndisliyi üzrə ixtisaslaşmış Turan Mütəllimov doktorantura tədqiqatlarında əsasən neftlə çirklənmiş mühitlərdə mikrob biodeqradasiyası üzərində fokuslanıb. Onun tədqiqatları rütubət, pH səviyyələri və ağır metallara görə xam neftin sahil torpaqlarında biodeqradasiyasını daha yaxşı proqnozlaşdırmağa kömək edən riyazi modellərin təkmilləşdirilməsinə yönəlib.

Doktorantura təhsilinə əlavə olaraq, Mütəllimov İtaliyanın Bolonya Universitetində Dəniz mühəndisliyi üzrə magistr dərəcəsi alıb ki, bu da onun neft sənayesində ətraf mühitin qorunması sahəsindəki biliklərini daha da zənginləşdirib.

Sözügedən seminar ətraf mühitin dayanıqlılığı və müasir neft tədqiqatları ilə maraqlanan tələbə və tədqiqatçılar üçün dəyərli biliklər təqdim edib.