UFAZ məzunu Günel Əlizadənin vulkanik qayaların istilik keçiriciliyi ilə bağlı elmi məqaləsi nəşr olunub

UFAZ-ın Geologiya proqramının məzunu, -hazırda Ümid-Babək Əməliyyat Şirkətində (UBOC) geoloq kimi fəaliyyət göstərən Günel Əlizadənin nüfuzlu Volkanologiya və Geotermal Tədqiqatlar jurnalında (Q1) elmi məqaləsi dərc etdirib. Onun "Müxtəlif məsaməli andezitin istilik keçiriciliyinə temperaturun (120 °C-ə qədər) təsiri" adlı məqaləsi vulkanik və geotermal proseslərin başa düşülməsindəki mühüm boşluğu aradan qaldırmağa yönəlib.

Günel Əlizadə tədqiqatında vulkanik qayaların istilik keçiriciliyini araşdırır ki, bu da vulkanik və geotermal proseslərin daha yaxşı başa düşülməsinə kömək edən bir çox modellərdə əsas parametrdir. Otaq temperaturunda aparılan laboratoriya ölçmələrindən fərqli olaraq, Günel Əlizadənin tədqiqatı istilik keçiriciliyinin 120 dərəcəyə qədər temperaturda necə dəyişdiyini araşdırır.

Bu innovativ yanaşma volkanologiya və geotermal enerji sahələrinə əhəmiyyətli töhfə verə biləcək qiymətli məlumatlar təqdim edir. Bu mühüm tədqiqatı daha ətraflı öyrənmək istəyənlər məqalənin tam versiyasını oxuya bilərlər: https://doi.org/10.1016/j.jvolgeores.2024.108140