UFAZ və ADNSU-nun Birgə Şahmat Turniri Keçirildi

Aprelin 13-də UFAZ-ın Şahmat Klubu və ADNSU THİK Sabahın birgə təşkil etdiyi şahmat turniri baş tutdu. Turnirdə hər iki universitetdən ümumilikdə 47 tələbə iştirak etdi. Dostluq və rəqabət ruhunda keçən tədbir tələbələr arasında şahmata olan marağın artdığını nümayiş etdirdi.

7 maraqlı və gərgin turdan ibarət turnirin iştirakçıları yüksək diqqət, analitik düşüncə və strateji oyun bacarıqlarını nümayiş etdirdilər. Müsabiqə ərzində gərgin mübarizə və diqqətəlayiq qarşılaşmalar reallaşdı.

Fərqlənən iştirakçılar tədbirin sonunda uğurlu nəticələrinə görə mükafatlandırıldılar. Zahid Allahverdiyev (ADNSU) 6.5 xalla birinci yerə layiq görüldü. Əli İsrafilov (ADNSU) və Səid Vəlizadənin (ADNSU) hər biri 6 xal qazanaraq sonrakı yerləri tutdular. Rəsul Rəhimbəyov (UFAZ) isə 5.5 xalla qiymətləndirilən çıxışı ilə diqqət çəkdi.

Tədbir UFAZ və ADNSU tələbələri arasında dostluq, əməkdaşlıq və qarşılıqlı hörmətin gücləndirilməsi baxımından əhəmiyyətli addım oldu. Eyni zamanda tələbə klublarının universitet həyatında aktiv və əhəmiyyətli fəaliyyətlərin təşkil edilməsindəki rolunu bir daha vurğuladı.