UFAZ rəhbərliyinin “Zeiss Microscopy” şirkətinin rəsmiləri ilə görüşü keçirilib

Noyabrın 19-da Azərbaycan-Fransız Universitetinin (UFAZ) tədris laboratoriyaları binasında UFAZ rəhbərliyi ilə “Zeiss Microscopy” şirkətinin rəsmiləri arasında görüş keçirilib.

Tədbirdə UFAZ-ın icraçı direktoru dosent Vazeh Əskərov, “Zeiss Microscopy”nin regional direktoru Guido Bauhammer, “Zeiss AMK” Azərbaycan filialının satış meneceri Elmir Bəşirov və “Medeks” şirkətinin baş icraçı direktorunun müavini iştirak ediblər.

Görüş zamanı tərəflər gələcək əməkdaşlıq imkanlarını və mikroskop sənayesindəki çağırışları müzakirə ediblər. Texnoloji yeniliklərin tətbiqi, məhsul keyfiyyətinin artırılması və sənaye standartlarına uyğun strategiyaların inkişaf etdirilməsi məsələləri diqqət mərkəzində olub.

Rəsmi görüşdən sonra qonaqlar UFAZ-ın yüksək texnologiyalı tədris laboratoriyalarına baş çəkiblər. Laboratoriyaların şəraiti, texniki avadanlıqların vəziyyəti və istifadəsi, həmçinin laboratoriya vasitələrinin keyfiyyətinin yüksəldilməsi ilə bağlı fikir mübadiləsi aparılıb.

Görüşün yekununda UFAZ-a iki “Primotech Zeiss” mikroskopu hədiyyə olunub. “Yer elmləri” və “Analitik kimya” laboratoriyalarında yerləşdirilən yeni mikroskoplar və tədris, elmi tədqiqat proseslərində istifadə olunacaq. Bu yüksək dəqiqlikli optik sistem material və mineralların analizində ixtisaslaşıb.

Mərkəzi Almaniyada yerləşən “Zeiss Microscopy” optik, elektron mikroskopiya və laboratoriya texnologiyaları istehsalında dünya lideridir. Şirkətin mikroskopları həm elmi tədqiqat, həm təhsil, həm də sənaye sahələrində geniş istifadə olunur.

Görüş nəticəsində UFAZ-la “Zeiss Microscopy” arasında elmi əməkdaşlığın gücləndirilməsi, tədris və elmi tədqiqatlarda birgə imkanların genişləndirilməsinə dair razılıq əldə edilib.