UFAZ-ın Riyaziyyat klubu Beynəlxalq Pi Gününə həsr olunmuş yarış keçirib

Martın 14-də Azərbaycan-Fransız Universitetində (UFAZ) Beynəlxalq Pi Günü və UFAZ-ın yaradılmasının 10 illik yubileyinə həsr olunmuş "DecaPi" riyaziyyat yarışı keçirilib. UFAZ Riyaziyyat klubu və "PathtoMath" həvəskar riyaziyyatçılar klubunun birgə təşkilatçılığı ilə baş tutan tədbir tələbələr arasında böyük maraqla qarşılanıb.

Yarışda müxtəlif ali təhsil müəssisələrini təmsil edən 14 komanda intellektual mübarizəyə qoşulub. Məşhur “Xəmsə” oyunu formatında keçirilən müsabiqədə əsas şərt sualları həm düzgün, həm də çevik cavablandırmaq olub. Komandalar analitik düşüncə və sürətli reaksiya nümayiş etdirərək çətin riyazi tapşırıqları həll ediblər.

Gərgin keçən bilik mübarizəsinin yekununda ADA Universitetini təmsil edən “Burkina Faso” komandası bütün rəqiblərini geridə qoyaraq birinci yerə layiq görülüb. Yarışın gümüş medalçısı Azərbaycan Dövlət Neft və Sənaye Universitetinin (ADNSU) “πllionaries” komandası, üçüncü yerin sahibi isə Bakı Mühəndislik Universitetinin (BMU) “Losiento” kollektivi olub.

"DecaPi" yarışının əsas məqsədi tələbələrin riyaziyyata olan marağını stimullaşdırmaq, onlara komanda ruhunu aşılamaq və mürəkkəb problemlərin operativ həlli üzrə bacarıqlarını inkişaf etdirmək olub.

Yarışda yüksək fəallıq nümayiş etdirən hər bir komandanı təbrik edir, onlara gələcək elmi fəaliyyətlərində yeni zirvələr arzulayırıq.