UFAZ-ın “Olympus Mind” intellektual oyunlar klubu ilk yarışmasını keçirdi

Azərbaycan-Fransız Universitetinin (UFAZ) yeni yaradılmış “Olympus Mind” intellektual oyunlar klubu ilk rəsmi tədbirini uğurla həyata keçirdi. İntellektual yarış tələbələri bilik, strategiya və komanda işi ətrafında birləşdirdi.

Yarışmada səkkiz komanda öz biliklərini sınağa çəkdi. Üç turdan ibarət yarış hər turda 12 sual olmaqla ümumilikdə 36 sualı əhatə etdi. İştirakçılar, əsasən, ümumi dünyagörüşü mövzularına yönəlmiş suallar ətrafında güclü analitik düşüncə və sürətli qərarvermə bacarıqlarını nümayiş etdirdilər.

Yarışmanın sonunda uğur qazanan komandalar elan edildi. “UwU Chans” davamlı dəqiqlik və komanda işi ilə birinci yeri qazandı. Böyük bilik və rəqabət ruhu sərgiləyən “Dynamite” ikinci yeri tutdu. “Ecliptica” isə sabit və qətiyyətli performansı ilə üçüncü pillədə qərarlaşdı.

Tədbir UFAZ tələbələri arasında tənqidi düşüncə, komanda işi və öyrənməni təşviq etməyə imkanı verdi.