UFAZ-ın “Nexora” komandası IDDA Hakatonunda birinci yeri tutub!

Azərbaycan-Fransız Universitetinin (UFAZ) tələbələrindən ibarət “Nexora” komandası İnnovasiya və Rəqəmsal İnkişaf Agentliyinin təşkilatçılığı ilə keçirilən IDDA Hakatonunda qalib gəlib.

Fintek innovasiya marafonu tələbə, sahibkar və texnologiya həvəskarlarını bir araya gətirərək aktual maliyyə problemlərinə həll yolları axtarmağa imkan yaradıb. Tədbir həm Azərbaycanda növbəti fintek startap dalğası üçün platforma formalaşdırıb, həm də yaradıcı biznes ideyalarının real həllərə çevrilməsini təşviq edən ekosistemin qurulmasına töhfə verib. Bununla yanaşı, yüksək potensiallı gənclərin aşkarlanması və innovativ ideyaların sınaqdan keçirilməsi üçün əlverişli şərait təmin edilib.

48 saatlıq intensiv hakatonda UFAZ tələbələri yüksək yaradıcılıq, problem həll etmə, test etmə və çevik düşünmə bacarıqlarını nümayiş etdiriblər. Fidan Allahverdiyeva, Nəzrin Əliyeva, Asiman İsmayılova və Səmra Abdullayevadan ibarət “Nexora” komandası göstərdiyi performansla rəqiblərindən fərqlənərək birinci pillədə qərarlaşıb.

İlk üç yeri tutan komandalar IDDA İnkubasiya Proqramına birbaşa keçid imkanı qazanıblar. Proqram çərçivəsində onlar layihələrini daha da inkişaf etdirmək üçün strukturlaşdırılmış dəstək, mentorluq və müxtəlif resurslar əldə edəcəklər.

Yaradıcılıq və əzmkarlıq nümayiş etdirərək qazandıqları bu uğura görə UFAZ tələbələrini təbrik edir, gələcək fəaliyyətlərində uğurlar arzulayırıq!