UFAZ-ın “Su ehtiyatlarının idarəedilməsi” ixtisasının tələbələri ADSEA-ya səfər ediblər

Azərbaycan-Fransız Universitetinin (UFAZ) “Su ehtiyatlarının idarəedilməsi” üzrə magistratura ixtisasında təhsil alan tələbələri üçün Azərbaycan Dövlət Su Ehtiyatları Agentliyinə (ADSEA) praktik səfər təşkil olunub.

ADSEA ilə dərin strateji əməkdaşlıq çərçivəsində keçirilən seminarın əsas məqsədi nəzəri biliklərin bilavasitə sahə təcrübəsi ilə birləşdirilməsini təmin etmək idi. Qurumun Su keyfiyyəti sektorunun müdiri Dr. Elnur Nəsirov tələbələr qarşısında su resurslarının idarə olunması və su keyfiyyətinin ictimai sağlamlıqla əlaqəsi mövzusunda geniş məruzə ilə çıxış edib. Təqdimat zamanı xüsusilə Azərbaycanda rast gəlinən tətbiqi hallar – suyun minerallaşma dərəcəsinin yüksəlməsi, bulantılıq hadisələri və kənd yerlərində su təchizatı sistemlərində yarana biləcək mikrobioloji risklər ətraflı şəkildə təhlil olunub. Bu interaktiv mühazirə tələbələrin lokal su problemləri və onların həll yolları barədə təsəvvürlərini genişləndirməsinə yol açıb.

Mühazirə hissəsindən sonra tələbələr Agentliyin Mərkəzi Su Keyfiyyəti Laboratoriyasına baş çəkiblər. Laboratoriya ziyarəti zamanı tələbələrə suyun keyfiyyətinin qiymətləndirilməsi üçün istifadə olunan ən müasir avadanlıqlar nümayiş etdirilib və tipik analizlərin aparılma metodikası əyani şəkildə göstərilib. Təqribən iki saat davam edən bu praktik sessiya tələbələrin laboratoriya mühitinə adaptasiyasına və gələcək peşəkar fəaliyyətlərində rastlaşacaqları texniki prosesləri daha dərindən anlamalarına şərait yaradıb.

Qeyd edək ki, “Su ehtiyatlarının idarəedilməsi” magistratura ixtisasında təhsil alan tələbələrin 5-i Azərbaycan Dövlət Su Ehtiyatları Agentliyində (ADSEA) və agentliyin əlaqəli qurumlarında fəaliyyət göstərir. Eyni zamanda, ADSEA bu sahə üzrə kadr hazırlığı prosesinə dəstək göstərmək məqsədilə “Su ehtiyatlarının idarəedilməsi” ixtisasında təhsil alan bütün tələbələrə təqaüd verir.