UFAZ-ın 14 tələbəsi “Azərbaycan Mühəndislik Yarışı”nda mükafata layiq görülüb

Azərbaycan-Fransız Universitetinin (UFAZ) 14 tələbəsi Azərbaycan Dövlət Neft və Sənaye Universiteti (ADNSU) və “Elsevier”in birgə təşkil etdiyi “Azərbaycan Mühəndislik Yarışı”nda mükafata layiq görülüb. Yarışda ən yüksək nəticəni UFAZ-ın “Kompüter elmləri” ixtisasında təhsil alan Pavel Kuznetsov göstərib.

Mayın 4-də Azərbaycan Dövlət Neft və Sənaye Universitetində (ADNSU) qaliblərinin mükafatlandırma mərasimi keçirilib. Tədbirdə çıxış edən ADNSU-nun rektoru, dosent Rüfət Əzizov rəqəmsal elmi resursların müasir təhsildə rolunu qeyd edərək bu cür platformaların tələbələrin bilik və bacarıqlarının inkişafında mühüm əhəmiyyət kəsb etdiyini deyib. Həmçinin bu yarışların tələbələrin beynəlxalq elmi məlumat bazalarından istifadə vərdişlərini artırmaqla yanaşı, onların gələcək peşəkar fəaliyyətinə də müsbət təsir göstərdiyini vurğulayıb.

Elm və innovasiya məsələləri üzrə prorektor, dosent Elviz İsmayılov yarış barədə ətraflı məlumat verib. O qeyd edib ki, müsabiqədə ölkənin 16 universitetindən 160-dan çox tələbə iştirak edib və iştirakçılar mühəndislik üzrə elmi platformalar üzərindən tapşırıqları yerinə yetirərək biliklərini sınayıblar.

Sonra “Informascope” şirkətinin satış direktoru Ümit Yontar çıxış edərək bu cür təşəbbüslərin əhəmiyyətindən danışıb. O, belə yarışların beynəlxalq elmi resurslara çıxışının genişləndirilməsinin tələbələrin qlobal səviyyədə rəqabət qabiliyyətini artırdığını bildirib.

Qeyd edək ki, 20 aprel – 1 may tarixlərini əhatə edən yarış tələbələrin “Knovel” və “Engineering Village” platformalarından istifadə bacarıqlarını inkişaf etdirmək məqsədi daşıyıb.

Sonda bütün qaliblərə diplom və dəyərli hədiyyələr təqdim olunub.