UFAZ-da “Eco Day” tədbiri keçirilib

Noyabrın 6-da Azərbaycan-Fransız Universitetində (UFAZ) ətraf mühitin qorunması, dayanıqlı inkişaf və tullantıların düzgün idarə olunması mövzularına həsr olunmuş “Eco Day” tədbiri keçirilib.

Tədbir çərçivəsində iştirakçılar dayanıqlı inkişaf və tullantıların idarə olunması ilə bağlı maarifləndirici təqdimatı dinləyib, ekoloji mövzulu foto guşəsində şəkillər çəkdirib və tullantı materiallarından hazırlanmış əl işlərindən ibarət sərgi ilə tanış olublar.

“Eco Day”in maraqlı hissələrindən biri də tələbələrin tullantı və təkrar emal materiallarından hazırladıqları yaradıcı əl işlərinin nümayişi olub. Təşəbbüs gündəlik istifadə olunan materiallara yeni həyat verməyin və onların faydalı, eləcə də estetik əşyalara çevrilməsinin mümkünlüyünü nümayiş etdirib. Ən yaradıcı əl işinin müəllifi xüsusi hədiyyə ilə mükafatlandırılıb.

Tədbir çərçivəsində, həmçinin ekoloji bilikləri yoxlamaq məqsədilə viktorina təşkil olunub, qaliblərə hədiyyələr təqdim edilib. Gün iştirakçılar üçün təşkil olunan şəbəkələşmə sessiyası ilə yekunlaşıb.