Parisdə UFAZ-ın fəaliyyət perspektivlərinə dair fikir mübadiləsi aparılıb

Azərbaycan-Fransız Universitetinin (UFAZ) icraçı direktoru Vazeh Əskərov Parisdə Fransanın ali təhsil və diplomatik dairələrinin nümayəndələri ilə görüş keçirib.

Görüşdə Fransanın Ali Təhsil, Tədqiqat və Kosmik Fəaliyyətlər Nazirliyinin Avropa və beynəlxalq əlaqələr üzrə direktoru Donato Corci, həmin nazirliyin Avropa ölkələri ilə ikitərəfli münasibətlər üzrə məsul şəxsi Marion Lindenlob, eləcə də Fransanın Avropa və Xarici İşlər Nazirliyinin siyasət üzrə müşaviri Elenor Qarnye iştirak ediblər.

Tərəflər UFAZ-ın hazırkı fəaliyyət istiqamətləri, həyata keçirilən elmi-akademik proqramlar, tələbə və müəllim mübadiləsi imkanları və universitetin inkişaf perspektivləri barəsində ətraflı fikir mübadiləsi aparıblar.

Görüş Azərbaycan-Fransa akademik və elmi əməkdaşlığının yüksək qiymətləndirildiyini bir daha nümayiş etdirərək UFAZ-ın beynəlxalq ali təhsil məkanında mövqeyinin gücləndirilməsi üçün yeni imkanlar açıb.

İştirakçılar görüşü UFAZ-ın inkişaf strategiyasında mühüm mərhələ kimi dəyərləndirərək gələcəkdə daha genişmiqyaslı birgə layihələrin reallaşdırılmasına dəstək verməyə hazır olduqlarını bildiriblər.