UFAZ-da koqnitiv süni intellektlə bağlı elmi seminar keçirilib

Aprelin 30-da Azərbaycan-Fransız Universitetində (UFAZ) süni intellekt üzrə tədqiqatçı və strateq Dr. Rabih Amhazın təqdimatında “Diqqətin hüdudlarından kənarda: Şüurun mürəkkəb sistem kimi modelləşdirilməsi” adlı elmi seminar keçirilib.

Strasburq Universitetinin (Unistra) dosenti və “Icam Strasbourg-Europe”da tətbiqi süni intellekt tədqiqatlarının rəhbəri olan Dr. Amhaz seminar zamanı süni intellektin inkişafında yeni paradiqmadan bəhs edib. O, insan idrakının multimodal dərin öyrənmə vasitəsilə mürəkkəb və dinamik bir sistem kimi modelləşdirilməsi mövzusuna toxunub. Dr. Amhaz bildirib ki, süni intellektin insan idrakını tam ifadə edə bilməsi üçün sadəcə verilənlər kifayət deyil. Burada qavrayış, davranış və mühitdən gələn siqnalların inteqrasiyası əsas rol oynayır.

Dr. Amhaz təqdimatında süni intellekt və neyroelmlər arasında körpü yaradaraq adaptiv sistemlər, koqnitiv-məlumatlı interfeyslər və insan mərkəzli intellektual maşınların perspektivlərini bölüşüb. O, həmçinin kompüter görməsi, sensor məlumatları və maşın öyrənməsi texnologiyalarına əsaslanaraq insan davranışını təhlil edən və qərar qəbulu prosesini asanlaşdıran sistemlər üzrə tədqiqatlarından bəhs edib.

Seminarın sonunda süni intellektin sənayedə rəqəmsal transformasiya, “ağıllı” infrastrukturun monitorinqi və innovasiya yönümlü təlim proqramlarında tətbiqi ətrafında interaktiv müzakirələr aparılıb.