UFAZ əməkdaşları üçün Qarabağa kollektiv səfər təşkil olunub

İyunun 20-21-də Azərbaycan-Fransız Universitetinin (UFAZ) rəhbərliyi, müəllim heyəti və digər əməkdaşları üçün Qarabağ bölgəsinə komanda quruculuğu səfəri təşkil olunub.

Səfərin əsas məqsədi universitet kollektivinin birliyinin daha da möhkəmləndirilməsi, əməkdaşlar arasında ünsiyyət və əməkdaşlığın inkişaf etdirilməsi, həmçinin işgüzar mühitdən kənarda komanda ruhunun gücləndirilməsi olub.

İki gün davam edən proqram çərçivəsində iştirakçılar Laçın, Xankəndi və Şuşa şəhərlərini ziyarət ediblər. Səfər zamanı kollektiv Qarabağın tarixi, mədəni və təbii irsi ilə yaxından tanış olmaq imkanı əldə edib.

Proqram çərçivəsində iştirakçılar Laçın şəhərində yerləşən Bayraq Meydanı, “Gilabi Ceramics”, Xankəndidə Qarabağ Universiteti, Şuşa şəhərində isə Şuşa qalası, Molla Pənah Vaqifin məqbərəsi, Cıdır düzü, İsa bulağı, Yuxarı Gövhər Ağa məscidi və digər tarixi-mədəni məkanları ziyarət ediblər.

UFAZ-da mütəmadi olaraq təşkil olunan komanda quruculuğu tədbirləri universitet kollektivinin həm peşəkar, həm də sosial əlaqələrinin gücləndirilməsinə və əməkdaşlıq ruhunun inkişafına töhfə verir.