UFAZ-da Akademik İnkişaf Şurasının üçüncü iclası keçirilib

Aprelin 7-9-da Azərbaycan-Fransız Universiteti (UFAZ) Strasburq Universiteti (Unistra) ilə əməkdaşlıq çərçivəsində üçgünlük Akademik İnkişaf Şurası iclaslarını təşkil edib.

Görüşlərin əsas məqsədi bakalavr və magistratura ixtisaslarını nəzərdən keçirmək və təkmilləşdirmək olub. Hibrid formatda keçirilən iclaslar Bakı və Strasburqdan olan professor müəllim heyətini, proqram rəhbərlərini, ADNSU-nun akademik heyətini, sənaye tərəfdaşlarını, UFAZ-ın məzun və tələbələrini bir araya gətirib.

Aprelin 7-də keçirilən ilk iclas “Kimya mühəndisliyi” və “Kimya” ixtisaslarına həsr olunub. Sessiya UFAZ-ın icraçı direktoru Vazeh Əskərov, baş katib Martin Qodon və UFAZ-ın fəaliyyət üzrə meneceri Yannik Hoaronun açılış nitqləri ilə başlayıb.

Daha sonra proqram rəhbərləri Alin Meys (onlayn), Frederik Melin, Dünya Babanlı, Filip Bertani, “Kimya mühəndisliyi” proqramının koordinatoru Maksim Florent və Tədris Şöbəsinin müdiri Səmra Şiriyeva kurikulumdakı dəyişikliklər və tələbələrin müvəffəqiyyət göstəriciləri barədə təqdimatlarla çıxış ediblər. Karyera Mərkəzinin koordinatoru Qənirə Nəsibova məzunların məşğulluq dərəcəsi və karyera perspektivləri barədə məlumat verib.

İclasda “SOCAR Polymer”, “SOCAR Downstream”, bp, “Azərikimya” İB və SOCAR Karbamid Zavodu kimi sənaye liderlərinin nümayəndələri kurikulumun müasir əmək bazarına uyğunlaşdırılması barədə rəylərini bölüşüblər.

Görüşdə kurikulumun təkmilləşdirilməsi, yeni texnologiyaların tədrisə inteqrasiyası və tələbələrin akademik müvəffəqiyyət göstəriciləri əsas müzakirə mövzuları olub.

Aprelin 8-də “Geologiya və geofizika mühəndisliyi”, eləcə də “Neft və qaz mühəndisliyi” ixtisasları üzrə iki ayrı sessiya keçirilib. “Geologiya və geofizika mühəndisliyi” üzrə proqram rəhbərləri Damien Lemarşan, Gilyermo Bozetti, proqram koordinatorları Lukas Bofill və Arzu Əliyeva kurikulumdakı yenilikləri təqdim ediblər. SOCAR, bp, JOCAP, “Socar Fugro” və “eiGroup” şirkətlərinin nümayəndələri müasir sənaye tələbləri ilə bağlı fikirlərini səsləndiriblər.

“Neft və qaz mühəndisliyi” ixtisası üzrə görüşdə proqram rəhbəri Yannik Branke və koordinator Fidan Aslanzadə təqdimatlarla çıxış ediblər. SOCAR, SLB, bp və JOCAP şirkətlərinin nümayəndələri əmək bazarındakı yeni tendensiyaları bölüşüblər.

Müzakirələr zamanı kurikulumların praktik tətbiqləri, sənayedəki mövcud boşluqların aradan qaldırılması və tələbələrin peşəkar mühitə hazırlığına diqqət yetirilib. Xüsusilə məzunların beynəlxalq iş mühitindəki uğurları və ixtisasların üstünlükləri təhlil edilib.

Aprelin 9-da keçirilən sonuncu iclas “Kompüter elmləri” ixtisasına həsr olunub. Proqram rəhbərləri Sesiliya Zanni-Merk, Stefan Ceno və proqram koordinatoru Nahla El Kadhi struktur dəyişiklikləri və yeni texnologiyaların tədrisdə tətbiqi barədə məlumat verib.

İclasda “Kibrit Tech”, “Paşa Bank”, “eiGroup” və “Proxima Cyber” şirkətlərinin əməkdaşları data elmi və süni intellekt üzrə bacarıqlara yiyələnməyin vacibliyinə toxunublar.

İştirakçılar müasir texnologiyaların tədrisdə tətbiqi, tələbələrin karyera hazırlığı və proqramın rəqəmsal mühitə uyğunluğu ətrafında fikir mübadiləsi aparıblar.

İclasların sonunda gələcək təkmilləşdirmələr üçün konkret fəaliyyət planları razılaşdırılıb. Məqsəd UFAZ tələbələrinin həm sənayedə, həm də akademik sahədə beynəlxalq səviyyəli karyeraya tam hazır olmalarını təmin etməkdir.