ADNSU və UFAZ əməkdaşlarına yeni quraşdırılmış “Shimadzu ICP-MS” sistemi üzrə təlim keçilib

Azərbaycan-Fransız Universitetinin (UFAZ) tədris laboratoriyaları binasında yeni quraşdırılmış “Shimadzu ICP-MS” sistemi üzrə dörd günlük təlim proqramı uğurla başa çatdırılıb. Təlim Azərbaycan Dövlət Neft və Sənaye Universitetinin (ADNSU) və UFAZ-ın laboratoriyalarında fəaliyyət göstərən müəllimlər, laborantlar və texniki heyət üçün təşkil olunub.

Təlim çərçivəsində iştirakçılara ICP-MS cihazının iş prinsipləri, tətbiq sahələri və gündəlik istismar qaydaları haqqında geniş nəzəri biliklər təqdim olunub. Eyni zamanda, keçirilən praktik sessiyalar zamanı iştirakçılar cihazın istifadəsi, nümunələrin hazırlanması, analiz prosesləri, kalibrasiya mərhələləri və texniki qulluq prosedurları ilə yaxından tanış olublar.

Qeyd edək ki, müasir Shimadzu ICP-MS sistemi ultra-aşağı konsentrasiyalarda metal və qeyri-metal elementlərin dəqiq analizini həyata keçirməyə imkan yaradır. Cihazın ətraf mühit monitorinqi, suyun keyfiyyətinin qiymətləndirilməsi, geokimya, materialşünaslıq və digər elmi-tədqiqat istiqamətlərində geniş istifadə olunacağı gözlənilir.