UFAZ-ın iki tələbəsi “Azercell”in təqaüd proqramının qalibi olub

Azərbaycan-Fransız Universitetinin (UFAZ) “Kompüter elmləri” ixtisası üzrə təhsil alan iki tələbəsi “Azercell Telekom” MMC-nin elan etdiyi nüfuzlu “Tələbə Təqaüdü Proqramı 2026”nın qalibi adını qazanıb.

Ölkənin rəqəmsal transformasiya və telekommunikasiya sahəsində aparıcı şirkətlərindən biri olan "Azercell" tərəfindən həyata keçirilən bu proqrama cari ildə 1460-dan çox müraciət daxil olub. Üç mərhələli seçim prosesindən uğurla keçən cəmi 15 tələbə qaliblər sırasına daxil ola bilib. Seçilmiş 15 nəfər arasında UFAZ-ın tələbələri olan Asiman İsmayılova və Elnur Haqverdiyev də yer alıb.

Proqramın əsas məqsədi yüksək akademik nəticələri olan istedadlı gənclərin peşəkar inkişafına dəstək vermək və ölkədə texnoloji sahədə kadr potensialını gücləndirməkdir.

Proqram çərçivəsində tələbələr aşağıdakı imkanları əldə ediblər:

• Təhsil müddətinin sonunadək aylıq təqaüd dəstəyi;
• Telekommunikasiya və müasir texnologiyalar sahəsində praktik biliklərin artırılması;
• Şirkət daxilində karyera imkanları və peşəkar təcrübə proqramları ilə yaxından tanışlıq.

UFAZ tələbələrini bu münasibətlə təbrik edir, proqram müddətində həyata keçirəcəkləri fəaliyyətlərində uğurlar arzulayırıq!