UFAZ-da 40 şirkətin iştirakı ilə Karyera Sərgisi keçirilib

Noyabrın 28-də Azərbaycan Dövlət Neft və Sənaye Universiteti (ADNSU) və Azərbaycan-Fransız Universitetinin (UFAZ) təşkilatçılığı ilə ənənəvi Karyera Sərgisi keçirilib. Sərgi qabaqcıl şirkətlər, sənaye liderləri və sahə peşəkarlarını yuxarı kurs tələbələri və məzunlarla bir araya gətirib.

Tədbir Azərbaycan-Fransız Universitetinin (UFAZ) icraçı direktoru, dosent Vazeh Əskərovun açılış nitqi ilə başlayıb. Daha sonra Azərbaycan Dövlət Neft və Sənaye Universitetinin (ADNSU) rektoru, dosent Rüfət Əzizov qonaqları salamlayıb və universitetin fəaliyyətinin uğurlu nəticələri haqqında təqdimatla çıxış edib. Rəsmi hissənin ardından sərgi zonası tələbələrə açıq elan edilib.

“SOCAR”, “SOCAR Polymer”, bp, “Azercell”, “SOCAR Downstream”, “AzerGold”, “Azersun”, “TotalEnergies”, “EiGroup”, “Deloitte”, ABB, “Simbrella”, “Azerconnect”, SLB, “Sustainera”, “Holcim”, “AzInTelecom”, “Bakı Metropoliteni” QSC, “EY Azerbaijan”, NORM, JOCAP və “Turan Drilling” də daxil olmaqla 40 şirkət sərgidə öz stendləri ilə təmsil olunub. Hər qurumun nümayəndələri öz şirkətlərinin fəaliyyət istiqamətləri, potensial kadr ehtiyatında hansı keyfiyyətlərə üstünlük verdikləri, mövcud vakansiya və təcrübə proqramları ilə bağlı ətraflı məlumat verib.

Sərgini ziyarət edən 500-dən çox tələbə və məzun şirkət nümayəndələrinə yaxınlaşaraq onları maraqlandıran suallara cavab alıb, cari bazar tələbləri, ixtisasyönümlü layihə, iş və təcrübə imkanları ilə tanış olublar.

Sərgi ilə paralel olaraq müxtəlif mövzular üzrə informativ sessiyalar baş tutub. UFAZ-ın magistratura ixtisasları haqqında ətraflı məlumat verilib. Dövlət Məşğulluq Agentliyi iştirakçılar üçün iki saatlıq səyyar konsultasiya təşkil edib. “AZCON Holding” isə “Rəqəmsal körpü” təcrübə proqramını auditoriyaya təqdim edib.

Karyera Sərgisi tələbə və məzunların peşəkar inkişafına dəstək göstərmək və sənaye ilə daha sıx əlaqə yaratmaq məqsədilə mühüm platforma kimi qiymətləndirilib.

Qeyd edək ki, UFAZ-da 2021-ci ildən etibarən hər il Karyera Sərgisi təşkil olunur. İlk sərgi UFAZ, Fransanın Azərbaycandakı Səfirliyi, Azərbaycan-Fransa Ticarət Palatası və Azərbaycan-Fransa Məzunları Assosiasiyasının birgə təşkilatçılığı ilə həyata keçirilib. 2022-ci ildə sərgi ikinci dəfə baş tutaraq qabaqcıl regional və beynəlxalq şirkətləri UFAZ-da tələbələrlə bir araya gətirib. 2023-cü ildə keçirilən növbəti sərgidə isə 40-dək şirkət öz stendləri və təqdimat sessiyaları ilə iştirak edib. 2024-cü ildə ənənəvi Karyera Sərgisi UFAZ-ın Karyera Mərkəzi və ADNSU-da yeni fəaliyyətə başlayan Karyera Mərkəzinin birgə təşkilatçılığı ilə keçirilib.