UFAZ-ın tələbəsi ASPG konfransında birinci yerə layiq görülüb

Azərbaycan-Fransız Universitetinin (UFAZ) “Neft və qaz mühəndisliyi” ixtisası üzrə tələbəsi Nuru Qasımov ASPG konfransında təqdim etdiyi elmi tədqiqat işi ilə birinci yerə layiq görülüb.

Konfransda Nuru Qasımov sedimentar sistemlərdə üzvi maddənin qorunması baxımından goetit mineralının lepidokrositə çevrilməsi və bu prosesin təsirlərinə dair araşdırmasını təqdim edib. Tədqiqatda dəmir oksihidroksidlərində baş verən mineral transformasiyaların üzvi maddənin saxlanılması və ya sərbəst buraxılması prosesinə təsiri analiz olunur. Bu isə öz növbəsində neft sistemlərinin effektivliyi və karbohidrogen potensialının qiymətləndirilməsi baxımından mühüm əhəmiyyət daşıyır.

Araşdırma Dr. Elşən Abdullayevin elmi rəhbərliyi altında aparılıb və bütün eksperimental işlər UFAZ-ın tədris laboratoriyalarında həyata keçirilib.

Nuru Qasımovu bu nailiyyəti münasibətilə təbrik edir, tədqiqat sahəsində uğurlarının davamlı olmasını diləyirik!