UFAZ-ın tələbəsi Yaponiyada beynəlxalq robototexnika yarışında iştirak edib

Azərbaycan komandaları dekabrın 6-7-də Yaponiyanın Tokio şəhərində keçirilən “All Japan Robot Sumo Tournament Grand Final 2025” yarışında uğurla çıxış edib. Yarışda Azərbaycan Respublikasının Gənclər və İdman Nazirliyinin dəstəyi ilə keçirilən “AİRO 2025” müsabiqəsinin qaliblərindən ibarət gənclər komandaları iştirak edib.

Azərbaycan-Fransız Universitetinin (UFAZ) “Kompüter elmləri” ixtisası üzrə tələbəsi Fidan Allahverdiyeva da qaliblərdən biri kimi komandada yer alaraq beynəlxalq arenada ölkəmizi təmsil edib. O, “AD-ASTRA” komandasında “Mega Sumo 3 kg Auto” kateqoriyasında iştirak edib. “AD-ASTRA” 113 komanda arasında uğurla çıxış edərək ilk mərhələləri keçib və 1/16 finaladək yüksəlib.

Fidan və komandası hazırladıqları robotun texniki dizaynı, mexaniki dayanıqlığı, sensorlarının dəqiqliyi və döyüş strategiyası baxımından münsiflər tərəfindən yüksək qiymətləndirilib. Komanda üzvləri həmçinin “All Japan Robot Sumo Tournament”in təşkilat heyəti ilə görüşərək beynəlxalq əməkdaşlıq imkanları, robototexnika sahəsində təcrübə mübadiləsi və gələcək layihələr barəsində müzakirələr aparıblar.

Bu səfər Fidan Allahverdiyeva üçün təkcə yarış təcrübəsi deyil, həm də beynəlxalq əlaqələr qurmaq, yeni texnologiyalar və strategiyalar öyrənmək baxımından əhəmiyyətli olub. UFAZ tələbəsini bu nailiyyəti münasibətilə ürəkdən təbrik edirik.