UFAZ tələbələri bp-nin "Discovery Week" proqramında iştirak ediblər

Azərbaycan-Fransız Universitetinin (UFAZ) bir qrup tələbəsi bp şirkətinin təşkil etdiyi "Discovery Week" proqramında iştirak edərək enerji sənayesi ilə yaxından tanış olublar. Beş günlük intensiv proqram tələbələrə nəzəri biliklərini real sənaye mühitində sınaqdan keçirmək və dünyanın qabaqcıl texniki mütəxəssislərindən birbaşa öyrənmək imkanı yaradıb.

UFAZ-ın “Geologiya və geofizika mühəndisliyi” ixtisası üzrə təhsil alan Muradxan Əhmədov, Hökumə Axundlu, Alina Qaysayeva və Zeynəb Kəlbiyeva, həmçinin “Neft və qaz mühəndisliyi” ixtisasının tələbələri Tural Xıdırov, Ömər Həsənov və Xədicə Səlimova bu nüfuzlu proqramda iştirak etmək imkanı qazanıblar.

Onlar seçim mərhələlərini uğurla keçərək bp-nin korporativ mədəniyyəti ilə tanış olmaq və gələcək karyera istiqamətlərini müəyyənləşdirmək şansı əldə ediblər. Tələbələr mütəxəssislərin rəhbərliyi altında texniki bacarıqların inkişafına yönəlmiş interaktiv seminarlarda iştirak edib, enerji sektorunun müasir çağırışları və həll yolları üzərində praktik tapşırıqlar icra ediblər.

UFAZ tələbələri üçün bu kəşfiyyat həftəsi yeni biliklər qazanmaqla yanaşı, həm də gələcək karyera perspektivlərini müəyyən etmək baxımından əhəmiyyətli olub.