UFAZ tələbələri “Huawei ICT Competition 2025-2026” Qlobal Finalında iki beynəlxalq mükafata layiq görülüblər

Azərbaycan-Fransız Universitetinin (UFAZ) tələbələri informasiya və kommunikasiya texnologiyaları sahəsində dünyanın ən nüfuzlu müsabiqələrindən biri hesab olunan “Huawei ICT Competition 2025-2026” müsabiqəsinin qlobal final mərhələsində mühüm uğura imza atıblar.

Azərbaycanı “Cloud Track” kateqoriyası üzrə təmsil edən UFAZ komandası milli, regional və beynəlxalq seçim mərhələlərini uğurla keçərək Çində keçirilən qlobal finalda dünyanın aparıcı universitetlərinin komandaları ilə mübarizə aparıb.

Komandanın tərkibində “Kompüter elmləri” ixtisasının 4-cü kurs tələbəsi Ayan İsmayılova, 3-cü kurs tələbələri Nəzrin Əliyeva və Əsmər Əliyeva yer alıblar. Komandaya UFAZ-ın İKT koordinatoru və “Huawei ICT Academy”nin müəllimi Pərviz Nəsirov rəhbərlik edib.

Tələbələr “Cloud Track Practical Competition” mərhələsində bulud infrastrukturu, sistemlərin yerləşdirilməsi, resursların idarə olunması və korporativ bulud həlləri üzrə bilik və bacarıqlarını nümayiş etdirərək qlobal finalda 3-cü yerə layiq görülüblər.

Komanda bununla yanaşı, informasiya-kommunikasiya texnologiyaları sahəsində qadınların rolunu və nailiyyətlərini təşviq edən nüfuzlu “Women in Tech Award” mükafatına da layiq görülüb. Bu mükafat texnologiya sahəsində uğur qazanan qadın tələbələrin nailiyyətlərinin beynəlxalq səviyyədə tanınması məqsədilə təqdim edilir.

Qlobal final proqramı çərçivəsində UFAZ nümayəndə heyəti “Huawei” şirkətinin Çində yerləşən əsas qərargahını da ziyarət edib. Tələbələr şirkətin innovasiya mərkəzləri, tədqiqat laboratoriyaları və sərgi pavilyonları ilə tanış olaraq bulud texnologiyaları, süni intellekt, 5G şəbəkələri, “ağıllı şəhər”lər və rəqəmsal transformasiya sahələrində ən son yeniliklər barədə ətraflı məlumat əldə ediblər.

Səfər iştirakçılara dünyanın müxtəlif ölkələrindən olan tələbə və müəllimlərlə ünsiyyət qurmaq, beynəlxalq əməkdaşlıq əlaqələrini genişləndirmək və qlobal texnologiya ekosistemi ilə yaxından tanış olmaq imkanı yaradıb.

UFAZ komandasını bu nailiyyət münasibətilə təbrik edir və onlara gələcək fəaliyyətlərində yeni uğurlar arzulayırıq.