UFAZ DİM-in ali təhsil müəssisələrinin sərgisində təmsil olunur

İyulun 29-da Azərbaycan-Fransız Universiteti (UFAZ) Azərbaycan Dövlət Neft və Sənaye Universiteti (ADNSU) ilə birlikdə Dövlət İmtahan Mərkəzinin (DİM) təşkil etdiyi ali təhsil müəssisələrinin sərgisində iştirak edib.

Sərginin açılış mərasimində DİM-in aparat rəhbəri Vəfadar Misirov qəbul kampaniyası və ixtisas seçimi prosesi barəsində məlumat verib. O, ixtisas seçimi ərəfəsində abituriyentlərin ali təhsil müəssisələrinin nümayəndələri ilə birbaşa ünsiyyət qurmasının əhəmiyyətini vurğulayıb. Daha sonra sərgi ilə tanışlıq həyata keçirilib.

Sərgi çərçivəsində UFAZ nümayəndələri potensial tələbələrə və onların valideynlərinə universitetin təqdim etdiyi təhsil imkanları barəsində ətraflı məlumat veriblər. Ziyarətçilər UFAZ-a qəbul qaydaları, ikili diplom proqramı, tədris prosesi, müasir maddi-texniki baza, ödənişsiz təhsil imkanları və universitetin digər üstünlükləri ilə tanış olublar. Eyni zamanda, onların universitetlə bağlı sualları ətraflı cavablandırılıb.

Qeyd edək ki, sərgidə 40-a yaxın dövlət və özəl ali təhsil müəssisəsi, eləcə də təhsil platformaları təmsil olunur. İyulun 31-dək davam edəcək sərginin məqsədi abituriyentləri ali təhsil imkanları ilə yaxından tanış etmək və onların ixtisas seçimi prosesinə dəstək göstərməkdir.