UFAZ-ın Voleybol klubu universitetlərarası turnir təşkil edib

Yanvarın 24-də Azərbaycan-Fransız Universitetinin (UFAZ) Voleybol klubu Azərbaycan Dövlət Neft və Sənaye Univerditetinin (ADNSU) idman zalında Universitetlərarası voleybol turniri keçirib. Yüksək rəqabət və enerjili atmosferdə keçən turnirdə ümumilikdə 8 komanda iştirak edib.

Turnirə qatılan 5 komanda UFAZ-ı təmsil edib. Xəzər Universiteti, ADA Universiteti və Bakı Ali Neft Məktəbinin (BANM) hər birindən isə 1 komanda iştirak edib. Gün ərzində davam edən gərgin və maraqlı qarşılaşmalar tələbələr arasında sağlam rəqabət və komanda ruhunu ön plana çıxarıb.

Yarışın yekunlarına əsasən, UFAZ-ın “Commandos” komandası turnirin qalibi olub. BANM təmsilçisi ikinci yerə, UFAZ-ın “BIG BIG DAY” komandası isə üçüncü yeri tutub. Fərqlənən komandalar medallarla təltif olunub, turnirin çempionuna isə kubok və xüsusi hədiyyələr təqdim olunub.