“Worley” şirkətinin nümayəndəsi UFAZ tələbələri üçün infosessiya keçirib

Yanvarın 23-də Azərbaycan-Fransız Universitetində (UFAZ) beynəlxalq mühəndislik və konsaltinq şirkəti “Worley”nin Aşağı Körfəz və Mərkəzi Asiya regionları üzrə baş vitse-pirezidenti Şaun Milsin iştirakı ilə infosessiya keçirilib. Görüş UFAZ tələbələrinə qlobal enerji və sənaye sektorunda karyera imkanları, liderlik yanaşmaları və peşəkar inkişaf mövzularında dəyərli biliklər qazandırıb.

Infosessiya zamanı Şaun Mils 30 ildən artıq beynəlxalq sənaye təcrübəsinə əsaslanaraq öz karyera yolundan bəhs edib. O, Cənubi Afrikada neft-kimya sənayesində elektrik mühəndisi kimi başladığı peşə fəaliyyətindən, EPC və EPCM tipli iri layihələrdə çalışmasından və 2007-ci ildən etibarən “Worley” şirkətində müxtəlif regional və liderlik vəzifələrində qazandığı təcrübədən danışıb.

Görüşdə karyera inkişafı ilə bağlı Qeri Bransonun 6 mərhələli karyera nəzəriyyəsi, inkişaf yönümlü düşüncə anlayışı, dəyişikliklərin qaçılmazlığı və bu dəyişikliklərə adaptasiya xüsusi olaraq qeyd olunub.

Liderlik mövzusuna toxunan Şaun Mils bildirib ki, effektiv rəhbərliyin əsasını gözləntilərin müəyyənləşdirilməsi, düzgün istiqamətin verilməsi, aydın kommunikasiya, rəylərə açıq olmaq və dəstəkləyici iş mühitinin yaradılması təşkil edir.

Görüş zamanı iş-həyat balansının qorunması, biznes və maliyyə bacarıqlarının inkişaf etdirilməsinin mühəndislər üçün əhəmiyyəti də diqqətə çatdırılıb. Infosessiya tələbələrin sualları və interaktiv müzakirələrlə davam edib.