UFAZ-da psixi sağlamlıq sahəsində süni intellektin tətbiqinə dair elmi seminar keçiriləcək

Tədbir haqqında

Azərbaycan-Fransız Universitetinin (UFAZ) məzunu və York Universitetinin (UoY) fəlsəfə doktoru (PhD) Dr. Yusif İbrahimovun təqdimatında “Süni intellekt əsaslı psixi sağlamlığın yenidən dəyərləndirilməsi: Formal nəzəriyyədən izah edilə bilən modelləşdirməyə” mövzusunda elmi seminar keçiriləcək.

Seminarda Dr. İbrahimov süni intellektin psixi sağlamlığın qiymətləndirilməsində məsuliyyətli və şəffaf şəkildə tətbiqi ilə bağlı araşdırma nəticələrini təqdim edəcək. Onun tədqiqatı süni intellektdə tez-tez rast gəlinən “qara qutu” problemini, yəni modelin hansı məntiq və amillər əsasında qərar verdiyini anlamağın çətinliyini araşdırır. Bu məqsədlə tədqiqatçı psixi sağlamlıq sahəsi üçün izah ediləbilən süni intellektin yeni nəzəri əsaslarını təklif edir. Bu yanaşma əsasında o, “MentalXAI” adlı innovativ model hazırlayıb. Model psixi sağlamlıqla bağlı məlumat bazasından istifadə edərək aydın, əsaslandırılmış və ixtisaslaşmış izahlar təqdim edir.

Seminar zamanı “MentalXAI” modelinin stres, depresiya və intihar meyilliliyini daha dəqiq və izah ediləbilən şəkildə müəyyən etdiyi, həmçinin psixolinqvistik biliklərlə uyğun nəticələr verdiyi nümayiş etdiriləcək.

Dr. İbrahimov UFAZ-dan məzun olduqdan sonra York Universitetində “Psixi sağlamlıqda izah ediləbilən süni intellekt” mövzusunda doktorantura təhsili alıb və bu müddətdə riyaziyyat və kompüter elmləri fənləri üzrə asistent kimi fəaliyyət göstərib. Onun tədqiqat işi nüfuzlu “AAAI Conference Workshop on Health Intelligence” konfransında təqdim olunub.

Bundan əlavə, Dr. İbrahimov “Yorkshire Innovation in Science and Engineering Conference” (YISEC) tədbirinin təşkilində magistratura və doktorantura üzrə tələbə nümayəndəsi kimi aktiv iştirak edib. O, “York Tədris və Öyrənmə Mükafatı” (YLTA) proqramını uğurla tamamlayaraq “Advance HE” tərəfindən tədris üzrə assosiasiya üzvü kimi rəsmi akkreditasiyaya layiq görülüb.

📌 Qeydiyyat linki: ttps://forms.office.com/r/Yg9TfMx8vX?origin=lprLink
🗓️ Tarix: 14 noyabr
⏰ Saat: 16:30
📍 Məkan: Nizami küç. 183, UFAZ, 102-ci otaq