UFAZ-da yağıntıların yol açdığı torpaq sürüşmələrinin modelləşdirilməsi üzrə elmi seminar keçiriləcək

Tədbir haqqında

Noyabrın 27-də Azərbaycan-Fransız Universitetində (UFAZ) “Fizikadan proqnoza: Yağıntıların törətdiyi torpaq sürüşmələrinin modelləşdirilməsi” adlı elmi seminar baş tutacaq. Seminar UFAZ-ın məzunu və Strasburq Universitetinin “Geofizika” ixtisası üzrə fəlsəfə doktoru dərəcəsini almış Dr. Rəşad Abbasov tərəfindən təqdim olunacaq.

Dr. Abbasov doktorantura təhsilini Dr. Marvan Fas və Dr. Reno Tussenin rəhbərliyi altında tamamlayıb. Onun araşdırmaları yağıntıların səbəb olduğu torpaq sürüşmələrinin hidro-mexaniki modelləşdirilməsinə fokuslanır. Bu tədqiqat “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində maliyyələşdirilib. Araşdırma mövzusu modellərdəki qeyri-müəyyənliklərin qiymətləndirilməsi, sadələşdirmələrin təsiri və səthi gərilmə amilinin rolu kimi mövzuları əhatə edib.

Doktorantura təhsilindən əvvəl Rəşad Abbasov UFAZ-da fərqlənmə ilə “Yer elmləri” ixtisası üzrə magistratura təhsilini, Azərbaycan Dövlət Neft və Sənaye Universitetində isə şərəf diplomu ilə “Geologiya mühəndisliyi” ixtisası üzrə bakalavr təhsilini başa vurub. O, Xoşbəxt Yusifzadə, Akif Əlizadə və SOCAR daxili təqaüdləri də daxil olmaqla bir sıra nüfuzlu təqaüdlərə layiq görülüb. O, hazırda Azərbaycan Dövlət Neft və Sənaye Universitetinin SABAH Mərkəzində “Neft və qaz geologiyası” ixtisası üzrə koordinator və müəllim olaraq fəaliyyət göstərir.

Seminar zamanı Dr. Abbasov su-torpaq mühitində maye axını və mexaniki proseslərin birlikdə necə modelləşdirildiyini izah edəcək. O, həmçinin bu inkişaf etmiş modellərin torpaq sürüşmələrinin daha dəqiq proqnozlaşdırılmasına hansı üstünlüklər qazandırdığını nümayiş etdirəcək.

📌 Qeydiyyat linki: https://forms.office.com/r/bPZJgwZTXB
🗓️ Tarix: 27 noyabr
⏰ Saat: 16:30
📍 Məkan: Nizami küç. 183, UFAZ, 102-ci otaq