UFAZ-da bakalavr ixtisaslarına həsr olunmuş Açıq Qapı Günü keçirilib

Azərbaycan-Fransız Universiteti (UFAZ) bakalavr ixtisaslarına həsr olunmuş Açıq Qapı Günündə UFAZ-da təhsil almağı hədəfləyən abituriyentləri və onların valideynlərini qəbul edib.

Tədbirdə çıxış edən UFAZ-ın icraçı direktoru, dosent Vazeh Əskərov fəaliyyətinin 10-cu ildönümünü qeyd edən universitetin ali missiyaları, tədris prosesi və indiyədək əldə edilən bir sıra uğurlar haqqında məlumat verib.

Daha sonra UFAZ-ın yaradılması, onun əsas tərəfdaşları və məqsədləri haqqında təqdimat həyata keçirilib, təhsil müəssisəsinin malik olduğu elmi-tədqiqat potensialı, eləcə də praktik, layihə və tədqiqata əsaslanan təhsilin üstünlüklərinə diqqət çəkilib. Ardınca 2026-2027-ci tədris ili üzrə UFAZ-a qəbul və qeydiyyat prosesi haqqında ətraflı informasiya verilib.

Tədbirin növbəti hissəsində UFAZ-ın tələbə və məzunlarına söz verilib. UFAZ-ın “Geologiya və geofizika mühəndisliyi” ixtisasından məzun olmuş və hazırda Oksford Universitetinin doktorantı olan Ələmdar Daşdəmirov təhsil yolu, ixtisas üzrə qazandığı əsas biliklər və beynəlxalq elmi məkandakı təcrübələrindən bəhs edib. “Neft və qaz mühəndisliyi” ixtisasında təhsil alan Mədinə Cəfərzadə isə tələbə həyatı, dərsdənkənar fəaliyyətlər, eyni zamanda praktikaya əsaslanan dərslər haqqında ətraflı məlumat verib.

Sual-cavab mərhələsində isə qonaqlar tədris fəaliyyəti, ixtisaslar və qəbul prosesi ilə əlaqədar onları maraqlandıran məsələləri dilə gətiriblər. İcraçı direktor Vazeh Əskərov və Tədris şöbəsinin müdiri Səmra Şiriyeva sualları əhatəli şəkildə cavablandırıblar.

Daha sonra UFAZ-ın Tələbə Şurasının üzvləri – Günay Əşrəfova və Nadir Əzizov tələbələrlə iş, onların sosial fəaliyyətlərə cəlb olunması və universitet rəhbərliyi ilə daimi əlaqələrin təmini haqqında təqdimatla çıxış ediblər. Bundan əlavə, onlar interaktiv oyunlar keçirərək auditoriyaya hədiyyələr təqdim ediblər.

Tədbirin daha bir əhəmiyyətli hadisəsi qonaqların UFAZ-ın 6 mərtəbəli, Avropa standartlarına uyğun şəkildə təşkil edilmiş tədris laboratoriyalarına ekskursiyası olub. Onlar laboratoriya əməkdaşlarının rəhbərliyi altında texniki təminat və praktik dərslər barəsində ətraflı məlumat əldə ediblər.